九月十六號晚，Ijji Sushi。
準備入座時，排前面係一個四十歲左右嘅女人，自己食。
Joan:「想像唔到一個人食壽司。」
我：「可能係食評家呢。」 七個人嘅壽司吧枱，坐住三對男女，再加上獨食女，就坐喺我哋兩夫婦左面。
總廚Billy Kong招呼我個邊嘅五個人。獨食女介紹自己剛啱喺香港搬嚟三藩市。見佢叫咗 wine pairing，自酌自飲。
食到第九碟，可能飲咗三杯，佢一路擺舊肥拖羅入口一路對住我哋笑："It's so good! I was waiting for this!" 搞到我唔係好欣賞到舊肥拖羅。
見獨食女咁熱情想傾偈，我哋就講起我哋係香港人，嚟慶祝生B。佢聽到好興奮，又話喺香港生活咗五年，住紅磡，好鍾意香港，又方便又多嘢食又有山有水，係佢去過公幹嘅城市裡面最特別嘅。嗰一刻，好想撳個share button俾香港嘅朋友睇。
講起香港，心裡面梗係感觸嘅。獨食女問我哋最掛住香港乜嘢食，Joan話蛋撻奶茶，我話麥太嘅味道。其實有乜嘢係唔變嘅呢，喺香港如果見到舊路牌舊舖頭竟然同細個一樣，係奇跡，要影低佢。社區變好，會掛住唔見咗嘅人情味；民風變差，會緬懷失去嘅公義良知。 「我最難忘係雨傘運動...」獨食女講到興起，師傅遞上食物，都要閘住咁cut入嚟介紹。我哋都覺得有少少煩，又冇得專心望師傅切魚，不過佢又咁想講，就由佢講。「我妹妹做記者，帶過我去睇佢哋搭營，唱歌，做功課，有見到反Cy Leung (佢真係讀 "psy leung"）嘅畫，宣揚佢哋嘅意念。成件事好 hippie，好感動人！」聽到呢度，我仲感觸... 跟住又返返去食嘢話題，榴槤火龍果乜乜乜。去到呢度啲嘢食都serve完，師傅嘅神色都輕鬆好多，食客講嘢都大聲啲。最好笑係獨食女話唔知chinatown有冇榴槤賣，個幫廚搭訕話有。嗰刻好想同佢講，你可以搭車搭船搭棚搭枱，但唔好搭訕！
獨食女首先埋單走人，又攬joan，又話好開心又恭喜我哋咁。
隔咗陣人人都有單，我哋冇喎。
侍應走嚟話：「獨食女已經埋咗你哋張單喇，佢叫我喺佢走之前都唔好講。」 雖然我wing wing哋，都同joan一齊擘大個口。美國人嘅 Random Act of Kindness，總算見識過。
